Gavana wa kijeshi wa Ituri, Jenerali-Majoro Gaby Kasongo Mulumba, amefika mchana wa Jumatatu, tarehe 7 Septemba 2026, mjini Mambasa, makao makuu ya territoire ya Mambasa.
Gavana huyo alipokelewa kwenye tribune officielle ya Mambasa, ambako alizungumza na wananchi waliokuja kumpokea. Mambasa ni eneo ambalo kwa muda mrefu limekuwa likikumbwa na ukosefu wa usalama unaosababishwa na makundi ya waasi ya hapa nchini na kutoka nje.
Katika ujumbe wake kwa wananchi, Gavana wa Ituri aliwataka kuwa na amani, umoja na mshikamano wa jamii, akisema kuwa mambo hayo yanaweza kusaidia kumaliza ukosefu wa usalama katika sehemu hiyo ya Ituri.
Alisema:
« Amani haiji kwa kutumia silaha pekee. Amani inatokana na umoja. Msiruhusu mtu yeyote aje kuwagawa. Hata kama mnatoka katika chefferies tofauti, nyote mnaishi katika territoire moja ya Mambasa. »
Katika hotuba yake, Gavana Kasongo Mulumba ametambua pia matatizo ambayo wananchi wa Mambasa wanapitia, hasa kuhama kwa wananchi kutoka maeneo yao na kushindwa kwa wakulima kwenda kwenye mashamba yao kutokana na ukosefu wa usalama.
Gavana huyo ameahidi kufanya kila kitu kinachowezekana ili kurudisha usalama katika maeneo yote ya territoire ya Mambasa.
Ziara hii ya Gavana inakuja siku chache tu baada ya mashambulizi ya kigaidi yaliyolenga vijiji vya chefferie ya Babila Bambombi.
Mashambulizi hayo yamesababisha wananchi wengi kukimbia makazi yao na kwenda katika maeneo wanayoona kuwa yako salama, hali ambayo pia imevuruga mwanzo wa mwaka mpya wa masomo katika sehemu hiyo.
Prince Syaghenda, kutoka Mambasa.
