Waandishi wa habari wapatao 20 kutoka vyombo vya habari vya mtandaoni mjini Bunia wanashiriki, kuanzia Alhamisi tarehe 27 hadi Ijumaa tarehe 28 Agosti 2026, katika mafunzo kuhusu namna ya kuzungumza na jamii kuhusu ugonjwa wa Ebola.
Mafunzo haya yanafanyika kwa muda wa siku mbili na yanalenga kuwasaidia waandishi wa habari kuongeza uelewa wao kuhusu Ebola, namna ya kujikinga, jinsi ya kutoa taarifa sahihi na namna ya kupambana na uvumi pamoja na taarifa za uongo wakati wa mlipuko wa ugonjwa.
Mafunzo hayo yanafanyika katika mfumo wa mradi wa kuimarisha uwezo wa waandishi wa habari na mashirika ya kiraia ili kusaidia jamii kufuata tabia nzuri za kujikinga dhidi ya Ebola nchini Ituri.
Mradi huu unafadhiliwa na Ushirikiano wa Maendeleo wa Uswisi (DDC) na kutekelezwa na Collectif des Radios Communautaires et de Proximité de l’Ituri (CORACOPI).
Katika siku hizi mbili, washiriki wanajadili mada mbalimbali, ikiwemo nafasi ya vyombo vya habari wakati wa hali ya dharura, mada iliyotolewa na mwezeshaji Immaculée VAY.
Mada nyingine zinahusu namna ya kutoa taarifa kuhusu shughuli za kukabiliana na Ebola, ugonjwa wa Ebola na dalili zake, nafasi ya jamii katika mapambano dhidi ya ugonjwa huo, pamoja na namna ya kutambua na kupunguza uvumi na taarifa za uongo.
Mafunzo haya yanafanyika wakati ambapo vyombo vya habari vina nafasi kubwa ya kusaidia jamii kupata habari za kweli na zinazoeleweka kuhusu Ebola.
Waandishi walioshiriki katika mafunzo haya wanatarajia kutumia maarifa waliyopata kuboresha namna wanavyokusanya, kuchambua na kutoa taarifa kuhusu masuala ya afya na dharura.
Kupitia mpango huu, CORACOPI na mshirika wake wanataka kusaidia jamii kupata taarifa sahihi na kuwahamasisha wananchi kuchukua hatua za kujikinga dhidi ya Ebola.
Uhariri
